II   M Ü D D Ə A

Birliyin məqsədi və fəaliyyət növləri

        2.1. Birliyin əsas məqsədi Azərbaycan gənclərinə vətənimizin tarixi keçmişi, habelə xalqımızın tarixi şəxsiyyətlərinin həyat və yaradıcılığı haqqında bilgilər verməklə onlara maarifçi vətənpərvər ruhu aşılamaqdan ibarətdir.
        2.2. Birliyin fəaliyyət predmetinə daxildir:
        2.2.1. Ölkəmizin gənclərini milli irsimizi özündə ifadə edən bir çox mədəni, tarixi sərvətlərin - arxeoloji, etnoqrafik, me`marlıq və digər abidələrin, parkların, xatirə yerlərinin, arxivlərin, xalq muzeylərinin və s. təbliği və qorunmasına cəlb etmək;
        2.2.2. Birliyin məqsəd və fəaliyyətinə uyğun surətdə müxtəlif fənlərlə bağlı öyrətmə kursları təşkil etmək;
        2.2.3. Müvafiq rayon rəhbərliklərinin icazəsi ilə Azərbaycanın qədim tarixi yaşayış məskənlərində aparılan arxeoloji qazıntı işlərinin nəticəsi ilə maraqlanmaq;
        2.2.4. Maarifçilik sahəsində Birliyin gördüyü işlər və onların nəticələri ilə bağlı yerli və dünya ictimaiyyətini mə`lumatlandırmaqdan ötrü təbliğat vasitələrindən istifadənin rolunu gücləndirmək;
        2.2.5. Xaricdəki soydaşlarımızla mədəni və elmi əlaqələr yaratmaq, onların maddi və mə`nəvi potensialını ölkəmizə yönəltmək üçün ciddi sə`y göstərmək;
        2.2.6. Qanunla müəyyən olunmuş qaydada kütləvi informasiya vasitələri (habelə teleradiokompaniyalar) tə`sis etmək, jurnallar, kitabçalar və s. çap edib yaymaq;
        2.2.7. Mümkün olan vəziyyətdə bə`zi ölkələrdə olan Azərbaycana məxsus bir çox tarixi sənət nümunələrinin: abidələrin, rəsm əsərlərinin və s. vətənə qaytarılması işini təşkil etmək;
        2.2.8. Qanunvericiliyə uyğun surətdə tarixi xarakterli sənədli və bədii film çəkilişlərini maliyyələşdirmək, o cümlədən xeyriyyə konsertləri, intellektual xarakterli müsabiqələr, yarışlar, festivallar və s. keçirmək;
        2.2.9. Elmi və təcrübi sahələrdə fəallıq göstərən Birlik üzvlərini və digər şəxsləri mükafatlandırmaq;
        2.2.10. Birliyin inkişaf fəaliyyəti ilə bağlı yeni proqramlar, konsepsiyalar hazırlamaq və təkliflər irəli sürmək;
        2.2.11. Müəyyən tarixi hadisələrlə bağlı əhalinin müxtəlif təbəqələri arasında rə`y sorğuları, monitorinqlər keçirmək və onların nəticələrini KIV ilə yaymaq, habelə həmin məsələlərdən doğan konkret problemlər ətrafında dövlət orqanları və ya digər təşkilatlar (QHT) ilə birgə fikir mübadiləsi və müzakirələr ("dəyirmi masa", forumlar, elmi-praktik konfranslar, simpoziumlar, disputlar və s.) aparmaq;
        2.2.12. Mövcud qanunvericiliyi gözləmək şərtilə Azərbaycan Respublikasında və digər dövlətlərdəki analoji qurumlarla mütəmadi surətdə əməkdaşlıq etmək, müvafiq informasiyalar mübadiləsini həyata keçirmək;
        2.2.13. Üzvlərinin dünyanın ən qabaqcıl elm və tədris ocaqlarında təhsil alması və təcrübə toplaması üçün onları xarici ölkələrə e`zam etmək;
        2.2.14. Torpaq sahələri, binalar, digər tikililər əldə etmək və ya icarəyə götürmək, habelə fondlarını tə`sis etmək;
        2.2.15. Filiallar, nümayəndəliklər, mərkəzlər, klublar, bölmələr, şö`bələr və s. yaratmaq;
        2.2.16. Qarşısındakı vəzifələri yerinə yetirməkdən ötrü maddi baza yaratmaq məqsədilə qanunvericiliyə uyğun şəkildə kommersiya və təsərrüfat fəaliyyəti ilə məşğul olan strukturlar yaratmaq;
        2.2.17. Qanunla yol verilən qaydada digər fəaliyyət növlərini həyata keçirmək
        2.3. Birlik Azərbaycan Respublikasının qanunvericiliyi ilə qadağan edilməyən, həmçinin bu Nizamnamənin müddəalarına zidd olmayan hər hansı fəaliyyət növünü həyata keçirə bilər.
        2.4. Birlik əldə edilmiş gəliri tə`sisçiləri, vəzifəli şəxsləri, digər üzvləri və köməkçiləri arasında bölməyərək ondan yalnız bu Nizamnamədə nəzərdə tutulan məqsədlərə nail olmağa yönəldilən sahibkarlıq fəaliyyətinin həyata keçirilməsi üçün istifadə edə bilər.

 © Hüquqlar qorunur! /TMGB/